Die toneelgroep van Hoërskool Louis Trichardt se stuk Harnas, wat die onderwerp van mensehandel aanspreek, is beskryf as oorspronklik en kreatief, ná hulle optrede by vanjaar se Clover Aardklop Nasionale Kunstefees in Potchefstroom.
Hoewel hulle nie ‘n prys gekry het nie, is regisseur en skrywer Marcel van Niekerk genader vir toestemming om Harnas met professionele akteurs op te voer.
Hoërskool Paarl Vallei van Somerset-Wes met WolkKop het met die eersteprys van die ATKV Tienertoneelkompetisie van R30 000 weggestap, met Hoërskool Jan van Riebeeck van Kaapstad tweede met Na ‘n ander aarde en Hoërskool Noordheuwel van Krugersdorp derde met Hartskelder.
Triegie Jamy Jonker het baie van WolkKop gehou. “Hulle toneelspel was baie oortuigend en hulle het my die hele tyd op die punt van my stoel gehad,” het Jamy gesê. Nog ‘n lid van die groep, Ndodzo Mawela, het gesê dat daar oneindig baie talentvolle tieners, skrywers en regisseurs in die land is. “Hulle talent het my verstom! Die ATKV doen regtig iets besonders vir die kunste,” het Ndodzo gesê. Marietjie Leonard het bygevoeg dat dit ‘n groot ervaring was om deel te kon wees van die ATKV se 50ste bestaansjaarvieringe by Aardklop.
Vir diegene wat Harnas misgeloop het, is dit ongelukkig neusie verby, want as gevolg van die matrieks se druk program, sal daar nie weer ‘n opvoering gehou kan word nie.